لاہور قلندرز کا پشاور زلمی کیخلاف ٹاس جیت کر بیٹنگ کا فیصلہ

پاکستان سپر لیگ میں آج ہونے والے دوسرے میچ میں لاہور قلندرز نے ٹاس جیت کر پشاور زلمی کےخلاف بیٹنگ کا فیصلہ کیا ہے۔

ڈیرن سیمی کی انجری کے باعث محمد حفیظ ان کی جگہ پشاور زلمی کے لیے کپتانی کے فرائض سرانجام دے رہے ہیں۔

پشاور کی ٹیم میں دو تبدیلیاں کی گئی ہیں۔ فاسٹ بولر کرس جارڈن کی جگہ حسن علی جبکہ انجرڈ ڈیرن سیمی کی جگہ ڈاؤسن کو موقع دیا گیا ہے۔

یہ حسن علی کا ٹورنامنٹ میں پہلا میچ ہے۔

میگا ایونٹ کا 14 واں مقابلہ دونوں ٹیموں کے درمیان پاکستانی وقت کے مطابق رات 9 بجے شروع ہوگا۔

دفاعی چیمپئن پشاور زلمی ایونٹ میں 4 میچز میں سے 2 میں کامیابی حاصل کر چکی ہے اور 2 میچز میں ناکامی کے ساتھ پوائنٹس ٹیبل پر 4 پوائنٹس کے ساتھ چوتھی پوزیشن پر ہے۔

پشاور زلمی کے کپتان ڈیرن سیمی گزشتہ میچ میں کوئٹہ گلیڈی ایٹرز کے خلاف کھیلتے ہوئے زخمی ہوگئے تھے جس کے باعث وہ آج کے میچ میں شرکت نہیں کر سکیں گے۔

پشاور زلمی کے کھلاڑی حارث سہیل پریکٹس سیشن کے دوران زخمی ہوگئے ہیں جس کے باعث انہیں آرام دیا گیا ہے۔

لاہور قلندرز کی ٹورنامنٹ میں کارکردگی مایوس کن رہی ہے اور میکلم الیون نے ایونٹ کے 4 میچز میں کوئی کامیابی حاصل نہیں کی ہے جس کے بعد ان کے لیے اگلے مرحلے میں ٹاپ 4 میں پوزیشن بنانا مشکل ہے۔