قوم عید الاضحیٰ پر کشمیری عوام سے یکجہتی کا اظہار کررہی ہے، عثمان بزدار

وزیراعلیٰ پنجاب عثمان بزدار نے کہا ہے کہ قوم عید الاضحیٰ پر کشمیری عوام سے یکجہتی کا اظہار کررہی ہے۔
تفصیلات کے مطابق وزیراعلیٰ پنجاب عثمان بزدار نے کہا ہے کہ مودی سرکار کے ظلم کے باعث کشمیری عید کی خوشیاں نہیں مناسکے ہیں، بھارت جتنا ظلم کرلے، کشمیریوں کی آزادی کی منزل قریب آچکی ہے۔
وزیراعلیٰ پنجاب نے کہا کہ ہم کشمیری عوام کے ساتھ کھڑے ہیں اور کھڑے رہیں گے، میں لاہور میں کشمیر ریلی کی قیادت کروں گا۔
دوسری جانب عثمان بزدار نے ڈاکوؤں کی فائرنگ سے شہید ہونے والے کانسٹیبل کے اہلخانہ سے ملاقات کی، عثمان بزدار نے کہا کہ شہید کانسٹیبل انصر جاوید نے فرض کی ادائیگی میں اپنی قیمتی جان قربان کی ہے۔وزیراعلیٰ پنجاب نے کہا کہ شہادت کا رتبہ پانے والے پولیس کانسٹیبل کو سلام پیش کرتے ہیں، شہدا کے لواحقین کے ساتھ مکمل اظہار یکجہتی کرتے ہیں، ہمیں آج شہدا کے اہلخانہ کو بھی یاد رکھنا چاہئے۔
وزیراعلیٰ پنجاب عثمان بزدار نے سرگودھا میں صفائی کے انتظامات بہتر بنانے کی ہدایت کرتے ہوئے کہا کہ آلائشوں کو مناسب طریقے سے ٹھکانے لگایا جائے۔
واضح رہے کہ چند روز قبل عثمان بزدار کا کہنا تھا کہ وزیراعظم عمران خان کا پارلیمنٹ کے مشترکہ اجلاس سے خطاب قوم کی آواز ہے، عمران خان نے بھارت کی مکاری کا پردہ فاش کردیا اور دنیا کو امن کا پیغام دیا ہے۔