مقبوضہ کشمیر میں بھارتی مظالم کو بے نقاب کرنے کے لئے دنیا بھر میں احتجاج

دنیا کے مختلف ممالک میں بھارت کی یوم آزادی کو یوم سیاہ کے طور پر منایا گیا ہے،مشہد کی تمام یونیورسٹیوں کے سیکڑوں طلباء نے یو این ایچ سی آر آفس کے سامنے احتجاج میں حصہ لیا۔
دنیا کے مختلف ممالک میں بھارت کی یوم آزادی کو یوم سیاہ کے طورپرمنایا گیا۔ مشہد، کنیڈا، مشیگن سمیت دنیا کے متعدد شہروں میں مقبوضہ کشمیر میں بھارتی مظالم کو بے نقاب کرنے کے لئے احتجاج اور نعرے بازی کی گئی۔
دنیا بھر کے مسلمانوں سے اپیل کی گئی کہ وہ کشمیر کے لئے اٹھ کھڑے ہوں۔ احتجاج میں شریک لوگوں کا کہنا تھا کہ بھارتی جارہیت اورآرٹیکل 370 کو کالعدم قرار دینے کے بعد اب ہماری کشمیری مائیں اور بہنیں محفوظ نہیں ہیں۔ مشہد میں طلباء نے ایک درخواست پر دستخط کیے جس میں امت مسلمہ کو کشمیر کے لئے اٹھ کھڑے ہونے کی درخواست کی گئی۔
بھارتی افواج کو کشمیر خالی کرنے کو کہا گیا ہے۔ کینیڈا میں بھی بھارتی مظالم کے خلاف پاکستانی نژاد کینیڈینوں نے ڈیلٹا ہوٹل اوٹاوا کے سامنے احتجاجی مظاہرہ کیا۔
اس موقع پر انہوں نے کینیڈا کی حکومت سے مطالبہ کیا کہ وہ بھارت کے ساتھ دوطرفہ تجارت بند کرے کیونکہ بھارت کشمیر میں انسانی حقوق کی سنگین پامالیوں میں ملوث ہے۔ شرکا نے نریندا مودی کے خلاف نعرے بازی کی۔