جاپانی، برطانوی انجینئرز نے انوکھا روبوٹ ایجاد کر کے دنیا کو حیران کر دیا

جاپانی اور برطانوی انجینئروں نے ایک ایسا انوکھا روبوٹ ایجاد کرلیا ہے جس کا جسم کسی جونک کی طرح لچک دار اور خم کھانے کے قابل ہے جبکہ وہ کسی دیوار پر چپک کر چڑھنے کی صلاحیت بھی رکھتا ہے۔
اس طرزکے روبوٹ کا تصور پہلے پہل تویوہاشی یونیورسٹی آف ٹیکنالوجی، جاپان کے ایاتوکناڈا نے پیش کیا جسے انہوں نے کیمبرج یونیورسٹی کی فومیا ایڈا کے تعاون سے عملی جامہ پہنایا۔ اس روبوٹ کی تفصیلات ریسرچ جرنل ’’سافٹ روبوٹکس‘‘ میں شائع ہوئی ہیں جبکہ کیمبرج یونیورسٹی کی جانب سے اس کی ایک ویڈیو بھی جاری کی گئی ہے.
دلچسپی کی بات یہ ہے کہ اس روبوٹ کی تیاری میں ویسا ہی لچک دار اور منقسم پائپ استعمال کیا گیا ہے جیسا کہ غسل خانوں میں عام استعمال ہوتا ہے۔ اس کے لچک دار اور بل دار جسم کے آخری سرے پر ایک سکشن کپ لگا ہے جو اسے دیوار سے چپکنے اور تھوڑا تھوڑا کرکے اوپر چڑھنے میں مدد دیتا ہے۔
جونک سے مشابہت کی بنیاد پر اس کے نام کا مخفف بھی ’’لیچ‘‘ رکھا گیا ہے جو ایک ایسے روبوٹ کی طرف اشارہ کرتا ہے جو نہ صرف لچکدار ہو بلکہ ضرورت پڑھنے پر اپنی لمبائی میں اضافے یا کمی کرنے کے قابل بھی ہو اور دیواروں پر بھی چڑھ سکتا ہو۔ ابھی یہ روبوٹ ابتدائی مرحلے پر ہے جسے امدادی کارروائیوں میں استعمال کےلیے مزید بہتر بنانے کا کام جاری ہے۔